Қазақстандық файтер Мұратбек Қасымбай (12-5) Иран өкілі Мухаммад Хейбатимен (5-3) екінші рет жекпе-жекке шығады. Бұл туралы KAZ.NUR.KZ Мұратбек Қасымбайдың Instagram желісіндегі парақшасына сілтеме жасап хабарлайды.
Екі файтер арасындағы реванш 14 маусымда Алматыда ресейлік Hardcore FC промоушенінің турнирі аясында өтеді.
Мұратбек Қасымбай мен Мухаммад Хейбати алғаш рет октагонда 2020 жылдың желтоқсанында кездескен еді. AMC Fight Nights 99 турнирінде өткен жекпе-жекте Хейбати төрешілердің бірауыздан шешімімен жеңген болатын.
"Қазақ терминаторы" лақап атымен танымал Мұратбек Қасымбай соңғы жекпе-жегін 2023 жылдың желтоқсанында "Наше дело 81" турнирінде өткізді. Ол Ресей өкілі Александр Грозинмен кездесіп, есе жіберді. Осылайша, мансабында 5-рет жеңіліске ұшыраған еді.
Еске салайық, Мұратбек Қасымбай UFC промоушенімен келіссөз жүргізіп жатқанын айтты.
Мақаланың түпнұсқасы: https://kaz.nur.kz/sport/mma/2086319-ufc-men-kelissoz-zurgizip-zatqan-qazaqstandyq-faiter-almatyda-zekpe-zek-otkizedi/
