UFC промоушенінің турнирі Қазақстанда өтуі мүмкін бе: MMA-менеджері жауап берді

"Octagon" аралас жекпе-жек лигасының президенті, промоутер және менеджер Нұраддин Садықов келешекте UFC турнирі Қазақстанда өтуі мүмкін екенін айтты. Бұл туралы KAZ.NUR.KZ "Хабар" телеарнасының Youtube желісіндегі ресми арнасына сілтеме жасап хабарлайды.

"Бұл туралы мен келіссөздер жүргізуді бастадым. Азиядағы ең мықты ұйымдардың біріміз, мықты файтерлер шығып жатыр деп өзімізді таныстырып жатырмыз. UFC турнирін Қазақстанда өткізу мүмкін емес нәрсеге жатпайды. Бізден Азат, Бекзат, Шавкат сияқты мықты жұлдыздар шығуы керек.

Кемінде 10-15 жұлдызымыз болса, даусымыз зор шығып, кесек-кесек сөйлей алатын едік. Бұл біз сияқты белгілі бір ұжымдар ғана мойнына алатын нәрсе емес. Мемлекеттен қолдау болса өткізуге болады деп ойлаймын", – деді Нұраддин Садықов.

Айта кетейік, қазіргі таңда UFC-де қазақстандық 6 файтер өнер көрсетеді. Олар: Шавкат Рахмонов, Асу Алмабаев, Бекзат Алмахан, Азат Максұм, Сергей Морозов және Мария Агапова.

Мәтіннен қате тапсаңыз, бізге жазыңыз