Ең жеңіл салмақта жұдырықтасатын UFC файтері Чарльз Джонсон (17-6) алдағы уақытта кіммен жекпе-жекке шыққысы келетінін айтты. Бұл туралы KAZ.NUR.KZ хабарлайды.
X желісінде жанкүйелердің бірі Чарльзден келесі қарсыласы кім болғанын қалайтынын сұраған. Джонсон үш есімді атады, олардың арасында қазақстандық спортшы Асу Алмабаев (21-2) та бар.
"Асу Алмабаев, Алекс Перес, Стив Эрцег немесе үздік ондыққа кіретін кез келген файтер", - деп жауап берді америкалық спортшы.
Қазір UFC-дің ең жеңіл салмақтағы рейтингінде Чарльз Джонсон 13-орында, ал Асу Алмабаев 7-орында тұр.
Асу Алмабаев соңғы жекпе-жегін биыл қазанда АҚШ-тағы UFC Fight Night 245 турнирінде өткізген еді. Ол бразилиялық файтер Матеус Николауды (19-4-1) ұтқан болатын. Осылайша Алмабаев кәсіби мансабында 21, UFC-де 4-рет жеңіске жетті.
Еске салайық, биыл ақпанда Чарльз Джонсон қазақстандық тағы бір спортшы Азат Мақсұмды (15-1) төрешілердің бірауыздан шығарған шешімімен жеңген болатын.
Мақаланың түпнұсқасы: https://kaz.nur.kz/sport/mma/2186204-azat-maqsumdy-zhenggen-amerikalyq-faiter-endi-tagy-bir-qazaqpen-zhudyryqtaspaq/
