Шавкат Рахмонов UFC чемпионымен Рамазан айында жекпе-жек өткізе ме: файтердің өзі жауап берді

UFC файтері Шавкат Рахмонов (18-0) чемпиондық белбеу үшін Белал Мухаммадпен (24-3-0-1) қасиетті Рамазан айында жекпе-жек өткізуге қатысты сұраққа жауап берді. Бұл туралы KAZ.NUR.KZ YouTube желісіндегі SauBall арнасына сілтеме жасап хабарлайды.

SauBall арнасының журналисі қазақстандық жауынгер Шавкат Рахмоновтан: "Егер сен Гэрриді жеңіп, UFC немесе Белалдан Рамазан айында чемпиондық жекпе-жекке шығу туралы ұсыныс түссе, жауабың қандай болар еді?" - деп сұрады.

"Біз бұл ұсынысты қарастырып, шешім қабылдаймыз. Бірақ дәл қазір нақты жауап беру қиын. Бұған дейін Рамазан айында жекпе-жек өткізіп көрмеппін", - деп жауап берді Шавкат Рахмонов.

Еске сала кетейік, Шавкат Рахмонов 8 желтоқсанда Лас-Вегаста (Невада, АҚШ) UFC 310 турнирі аясында Иэн Гэрримен (15-0) бес раундқа жоспарланған жекпе-жек өткізеді. Алғашында бұл жекпе-жек Белал Мухаммадпен чемпиондық белбеу үшін өтуі керек еді. Бірақ Белал Мухаммад жарақатына байланысты жекпе-жектен бас тартқан болатын.

Айта кетейік, 2025 жылы мұсылмандар үшін қасиетті Рамазан айы 28 ақпаннан 29 наурызға дейін жалғасады.