Олимпиаданың ашылу салтанатында Қазақстан туын ұстап шығатын спортшылардың киімі таныстырылды

26 шілдеде Франция астанасы Парижде жазғы Олимпиада ойындары басталады. Дүбірлі доданың ашылу салтанатында Асланбек Шымбергенов пен Ольга Сафронова Қазақстан туын ұстап шығады, деп хабарлайды KAZ.NUR.KZ тілшісі.

Боксшы Асланбек Шымбергенов пен жеңіл атлет Ольга Сафроноваға арнайы парадтық костюм тігілген. Шымбергенов ұлттық ою-өрнекпен әсемделген үзін етекті киім мен шалбар, басына бөрік киеді.

Ольга Сафронова ұзын жеңді көйлек, сондай-ақ Томирис патшайымның сәукелесіне ұқсас бас киім киеді.

Ұлттық құраманың басқа спортшылары мен делегация мүшелеріне де парадтық костюм тігілген. Әйелдерге арналған костюм 8 элементтен тұрады: басқа тағатын аксессуар, жейде, галстук, пиджак, шалбар, белдемше, шұлық және кроссовка. Ал ерлерге арналған костюм тақия, жейде, галстук, шалбар, пиджак, шұлық және аяқ киімнен тұрады.

Бұдан бөлек парадтық-спорттық костюм бар. Оны спортшылар мен спорт делегациясының мүшелері жарыстар кезінде, марапаттау рәсімдерінде киеді.

Сондай-ақ жаттығу кезінде, жарыстан тыс уақытта пайдалануға арналған спорттық форма жиынтығы дайындалған. Оның ішінде футболка, шорты, кепка, кроссовка, сөмке, сүлгі т.б заттар бар.

Айта кетейік, Париж Олимпиадасы 26 шілде мен 11 тамыз аралығында өтеді. Төрт жылдықтың басты бәсекесінде Қазақстан намысын 80 спортшы қорғайды. Ел қоржынында 25 спорт түрінен 92 лицензия бар.

Осыған дейін Олимпиадаға қатысатын қазақстандық спортшылардың толық тізімін жариялаған едік.

Мәтіннен қате тапсаңыз, бізге жазыңыз