Шетелдегі қазақ спортшылары Париж Олимпиадасында қандай нәтиже көрсетті (фото)
Опубликовано:
Франция астанасы Парижде өткен жазғы Олимпиада ойындарына шетелдегі қазақ спортшылары да қатысты. Бұл туралы KAZ.NUR.KZ тілшісі хабарлайды.
- Париж Олимпиадасында шетелдік қазақ спортшылары өнер көрсетті, оның ішінде Өзбекстаннан Ақтеңге Кеунімжаева мен Руслан Абдуллаев, Қытайдан Әбусайман Хабила мен Тоқтарбек Таңатқан бар.
- Бұл спортшылардың барлығы жүлдесіз қалды: Кеунімжаева мен Хабила алғашқы айналымдарда жеңілсе, Абдуллаев ширек финалда, ал Таңатқан 1/16 финалда сүрінді.
- Олимпиадаға қатысқан шетелдік қазақ спортшылары әр түрлі спорт түрлерінде өнер көрсетті: әйелдер күресі, еркін күрес және бокс.
Өзбекстандағы этникалық қазақ Ақтеңге Кеунімжаева Олимпиада ойындарында әйелдер күресінен 50 кг салмақ дәрежесінде сынға түсті. Ол 1/8 финалда украиналық балуан Оксана Ливачпен белдесіп, жеңіліп қалды. Егер Оксана финалға өтсе, Ақтеңге қола жүлдеге таласуға мүмкіндік алар еді. Алайда украиналық спортшы ақтық кезеңге шыға алмай, Кеунімжаева жүлдеден қол үзді.
Қытайдағы этникалық қазақ Әбусайман Хабила Париж боз кілемінде еркін күрестен 97 кг салмақ дәрежесінде бақ сынады. Ол алғашқы белдесуінде америкалық балуан Кайл Фредерик Снайдерге есе жіберді (9:5). Кайл финалға жолдама алса, Әбусайман жүлдеге таласа алар еді. Бірақ америкалық спортшы жартылай финалда сүрінді.
Өзбекстандағы тағы бір қазақ спортшысы Руслан Абдуллаев Париж Олимпиадасының ширек финалында жеңіліп қалды. 63,5 кг салмақ дәрежесінде жұдырықтасқан боксшы канадалық Уайатт Сэнфордқа төрешілердің шешімімен есе жіберді. Абдуллаев алғашқы жекпе-жегінде мексикалық Мигель Анхел Мартинесті жеңген еді.
Олимпиада ойындарында Қытайдың намысын тағы бір этникалық қазақ Тоқтарбек Таңатқан қорғады. 27 жастағы боксшы 80 кг салмақ дәрежесінде жұдырықтасты. Ол 1/16 финалда Доминикан спортшысы Кристиан Пиналеспен қолғап түйістіріп, 5:0 есебімен жеңіліске ұшырады. Кристиан Пиналесті жартылай финалда қазақстандық боксшы Нұрбек Оралбай жеңді.
Айта кетейік, Қазақстан құрамасы Париж Олимпиадасында 1 алтын, 3 күміс, 3 қола жүлде жеңіп алып, жалпыкомандалық есепте 43-орынға тұрақтаған еді.
- "Екі қабатты коттедж, көлік": Қырғызстан мен Өзбекстан Олимпиада жүлдегерлерін қалай қарсы алды (фото, видео)
- "Қалай билесе де жарасады": Демеу Жадыраев пен бапкерінің биі көпшілікті тәнті етті
Мәтіннен қате тапсаңыз, бізге жазыңыз
Оригинал статьи: https://kaz.nur.kz/sport/olympiad/2148163-sheteldegi-qazaq-sportshylary-parizh-olimpiadasynda-qandai-natizhe-korsetti-foto/