Франциялық балуан көлік кептелісі кесірінен медальдан айырылып қалды

Албанияның Тирана қаласында өтіп жатқан әлем чемпионатында франциялық балуан Стефан Клемент сәтсіздікке ұшырады. Ол көлік кептілісінің кесірінен белдесуге кешігіп қалды, деп хабарлайды KAZ.NUR.KZ.

Стефан Клемент грек-рим күресінен 63 кг салмақта ресейлік Садық Лалаевпен қола жүлде үшін күресуі керек еді. Алайда франциялық спортшы белдесуге кешігіп қалғандықтан, жеңіс Лалаевқа берілді.

"Француз Тиранадағы логистикалық мәселелерге байланысты жекпе-жекке кешігіп қалды. Ол кептелісте қалып қойған", - деп Ресей спорттық күрес федерациясының баспасөз қызметінің басшысы Тигран Аванян Telegram-дағы арнасында жазды.

Айта кетейік, 63 кг салмақта қазақстандық балуан Ержет Жарлықасын күміс медаль иеленген еді. Ол финалда әзербайжандық Нихад Захид Мамадлиден 1:6 есебімен жеңіліп қалған болатын.

Сондай-ақ әйелдер күресінен 72 кг дейінгі салмақта сынға түскен Жәмилә Бақбергенова финалда жапониялық Ами Исииге есе жіберіп, күміс жүлде еншіледі.

Бүгін, 31 қазанда қазақстандық еркін күрес шебері Нұрқожа Қайпанов алтын медальге таласады. Ол ақтық сында жапониялық Ешиносуке Аоягимен белдеседі.