Шымкентте спорт мектебінің қосымша корпусы пайдалануға берілді

Бүгін қала әкімі Ғабит Сыздықбеков Сайрам тұрғын алабындағы №12 спорт мектебі қосымша корпусының ашылу салтанатына қатысты. Тәуелсіздік күні қарсаңында қолданысқа берілген екі ауысымда жұмыс істейтін нысанда бір мезетте 200-ге жуық спортшы оқу-жаттығумен айналыса алады. Мұнда ауқымды спорттық жарыстар өткізуге болады, деп хабарлайды қала әкімдігінің баспасөз қызметі.

Әкімдіктің Instagram-дағы мәліметіне сүйенсек, заманауи талапқа сай бой көтерген ғимараттың жертөлесінде пауэрлифтинг және ауыр атлетика залдары және киім ауыстыру бөлмесі, душ қарастырылған. Сондай-ақ жаттықтырушылар, инструкторлар, төрешілер бөлмесі бар.

Бірінші қабатта вестибюль-фойе, күзетші бөлмесі, асхана, 210 орындық көрермендерге арналған трибунасы бар әмбебап спортзал, медициналық пункт жайғастырылған. Ал екінші қабатта демалыс холы, бокс, күрес, бадминтон оқу-жаттығу залдары орналасқан.

Бүгінде спорт мектебінің үздіктері үстел теннисі, бокс пен таеквондодан ұлттық құрама сапында, әлем, Азия чемпионаттарында жеңімпаз атанып жүр.

Мәтіннен қате тапсаңыз, бізге жазыңыз