Қазақстандық сәйгүлік Дубайдағы бәйгеде топ жарды (видео)

Нугул атты қазақстандық сәйгүлік Дубайдағы бәйгеде мәреге бірінші келді. Бұл туралы KAZ.NUR.KZ тілшісі хабарлайды.

"Мейдан" ипподромында өткен 1200 метр қашықтықтағы бәйгеге 5 тұлпар қатысты. Нугул мен жокей Эндрю Слаттери 4-нөмірде жарыс жолына шықты. Алғашында қазақстандық тұлпар бәрінен артта келе жатқанымен, мәреге бірнеше метр қалғанда оза шауып, жеңімпаз атанды.

Айта кетейік, Нугул – ақтөбелік атбегі Марат Көшеровтің сәйгүлігі. Тұлпардың бапкері – үндістандық Бхупат Симар.

Биыл тағы бір қазақстандық сәйгүлік Қабирхан қаңтарда Дубайда өткен екі бәйгеде де жеңіске жеткен еді. Ал наурызда болған әлем кубогінде мәре сызығын сегізінші болып кесті. Астанадағы Көшпенділер ойындарында Қабирханның иесі Тілек Мұханбетқалиевтің бір тұлпары алтын, екінші тұлпары күміс жүлде иеленді.