Отандық теннисші әлем чемпионатының іріктеу кезеңінде сенсация жасады

Билли Джин Кинг кубогінің (командалық әлем чемпионаты) іріктеу кезеңі аясында Ұлттық теннис орталығында Қазақстан – Польша матчы өтіп жатыр. Кортқа алғашқы болып әлемнің 45-ракеткасы Юлия Путинцева мен дүниежүзілік рейтингте 19-орында тұрған Магда Линетт шықты, деп хабарлайды Қазақстанның теннис федерациясы.

Осыған дейін қарсыластар өзара жеті рет кездесіп, соның бесеуінде Магда жеңіске жеткен.

Бірінші партияда Польша спортшысы 4:0 есебімен алға шыққан еді. Тек содан кейін ғана Юлия есепті қысқартты – 2:4. Магда есеп 5:2 болып, сетке доп бергенде, өз мүмкіндігін пайдалана алмады. Бұдан соң қазақстандық теннисші күш алды. Нәтижесінде 7:5 есебімен жеңіске жетті.

Қатарынан жеті геймді өз есебіне жазған Путинцева екінші сетті де сәтті бастады – 2:0. Содан соң тағы бір брейк жасап, 4:1-ге жеткізгенімен, Линетт сол бойда қайта қысқартты. Дегенмен Путинцева бәсекені тағы бір брейкпен түйіндеді – 6:3.

Осылайша, Қазақстан Польшаға қарсы ойында 1:0 есебімен алға шықты.

Мәтіннен қате тапсаңыз, бізге жазыңыз