Әзербайжан астанасы Бакуде өтіп жатқан таеквондодан чемпионының 5-жарыс күнінде екі отандық спортшы жарыс жолына шықты. Олар Рита Бакишева (46 келі) мен Жавохирхон Исламов (54 келі), деп жазады Спортты дамыту дирекциясы.
Рита Бакишева ширек финалға дейін сүрінбей жетіп, жүлдеге бір табан қалғанда қазіргі әлем чемпионы, 2021 жылғы Еуропа чемпионы Лина Стойковичке жол берді. Аса тартысты өткен айқастың алғашқы раундында отандастарымыз көп дәл соққы жасап, басым түсті. Алайда 21 жастағы хорватиялық таразы басын теңестіріп, осыдан кейін шешуші раундта да ұтып кетті. Рита 1/8 айналымында аустралиялық Джульет Дахудты, оның алдында испаниялық Лаура Кортегосо Лиманы айқын басымдықпен жеңген.
Жавохирхон Исламов Бурундиден келген Бенумугиша Гай Калебті ойсырата ұтып, чемпионатты жарқын жеңіспен бастаған. Алайда 2-айналымда Германия құрамасының өкілі Халед Абдель Халимнің мықты екенін мойындауға мәжбүр болды.
Ертең ел намысын Назым Махмұтова (62 келі) мен Нұрқанат Қожахметов (74 келі) қорғамақ.
Мақаланың түпнұсқасы: https://kaz.nur.kz/sport/other-sports/2023206-alem-cempionaty-tagy-bir-otandyq-sportsy-sirek-finalda-zenildi/
