Александр Бублик әйгілі Уимблдон турнирін сәтті бастады

Әлемнің 26-ракеткасы Александр Бублик Уимблдон турнирінің екінші айналымына шықты. Бұл туралы теннис федерациясына сілтеме жасаған KAZ.NUR.KZ хабарлайды.

Бублик алғашқы айналымда дүниежүзілік рейтингте 54-орында тұрған америкалық Маккензи Макдональдқа қарсы ойнады.

Бірінші партияда тай-брейкте сәтті ойнаған америкалық теннисші алға шықты. – 7:6 (7:3).

Екінші партияда есеп 4:4 болған мезетте Бублик брейк жасап, сосын өз геймін алды – 6:4.

Үшінші сетте қазақстандық теннисші доп берген кезде қателікке бой алдырып, қарсыласының брейк жасауына жол беріп қойды – 0:2. Дегенмен таразы басын теңестіре алды – 4:4. Содан кейін тағы бір брейкке қол жеткізіп, партияны өз пайдасына шешті – 6:4.

Төртінші партияда брейк жасаған қазақстандық спортшы 3:1 есебімен алға кетті. Ақыры матчты жеңіспен түйіндеді – 6:4.

Екі сағат 49 минутқа созылған тартысты бәсеке барысында Бублик 24 эйс жасап, 11 брейк-пойнттың төртеуін пайдаланды.

Александр екінші айналымда тағы бір америкалық, әлемнің 48-ракеткасы Джеффри Джон Вольфпен кортқа шығады.