Арина Алтухова нысана көздеуден әлем чемпионатында үздік үштікке енді

Нысана көздеуден жасөспірімдер арасындағы әлем чемпионатына Қазақстан қоржыны тағы бір медальмен толықты. Бұл туралы Спорт комитетіне сілтеме жасаған KAZ.NUR.KZ хабарлайды.

Ұлттық құрама спортшысы Арина Алтухова Оңтүстік Кореяның Чханвон қаласында өтіп жатқан жасөспірімдер арасындағы əлем чемпионатында күміс жүлдегер атанды.

Отандасымыз кіші калибрлі винтовкамен 50 метрден 3 позицияда (тік тұрып, жатып, тізерлеп тұрып) оқ атып, 455.7 ұпай жинады.

Бұл жаттығуда Вивьен Джой Джегги (Швейцария) әлем чемпионы атанды. Ол біздің Аринадан 1,6 балл артық жинады. Қола медаль тағы бір швейцариялық Эмели Джеггидің еншісінде.

Айта кетейік, жуырда Арина Алтухова осы бағдарламада Қазақстанның VI жазғы Спартакиадасында күміс медаль жеңіп алған. Сондай-ақ бірнеше ай бұрын Джакартада өткен әлем Кубогында жеңіске жеткен.

Бұған дейін тағы бір қазақстандық спортшы Никита Чирюкин чемпион атанған болатын.

Мәтіннен қате тапсаңыз, бізге жазыңыз