Астанада арбадағы теннистен Қазақстан чемпионаты аяқталды

Астанада арбадағы теннистен Қазақстан чемпионатының жеңімпаз-жүлдегерлері анықталды. Бұл туралы Қазақстанның теннис федерациясы хабарлайды.

Жарысқа Астана, Алматы, Шымкент, Қарағанды, Ақтөбе, Ақтау және Орал қалаларынан 30-дан астам спортшы қатысып, бақ сынады.

Қазақстан теннис федерациясы инклюзивтік даму департаментінің кураторы Сергей Селивановтың сөзіне қарағанда, екінші рет ұйымдастырылған ел чемпионаты жақсы өтті. Жеңімпаз-жүлдегерлер ескерткіш және ақшалай сыйлықтармен, диплом, медальдармен марапатталды.

"Арбадағы теннис Қазақстанда қауырт дамып келеді. 2027 жылға қарай спортшыларымыз Параазия, ал 2028 жылы Паралимпиадалық ойындарға қатысады деп сенемін", - деді Селиванов.

Біріншілік қорытындысы бойынша халықаралық турнирлерге қатысатын ұлттық құрама жасақталатын болады.

Мәтіннен қате тапсаңыз, бізге жазыңыз