Нысана көздеуден Бакуде өтіп жатқан әлем чемпионатында Қазақстан қоржынына тағы екі медаль түсті. Бұл туралы Спортты дамыту дирекциясына сілтеме жасаған KAZ.NUR.KZ хабарлайды.
Әйелдер арасында 10 метрден жылжымалы нысана көздеуден финалға екі қазақстандық спортшы - Зухра Ирназарова мен Александра Садуакасова шығып, бас жүлдені сарапқа салды.
Тартысты өткен ақтық сында Зухра отандасы Александрадан 6-3 есебімен басым түсіп, әлем чемпионы атанды. Ал қола украиналық Галина Авраменкоға бұйырды.
Айта кетелік, жартылай финалда қазақстандық спортшы әлемнің бес дүркін чемпионы атанған Украина атлетінен басым түскен.
Қазір Қазақстан құрамасының еншісінде 3 жүлде бар. Бірнеше күн бұрын стенд атудың трап бағдарламадасында Мария Дмитриенко мен Даниил Почивалов (микст) үздік үштікті түйіндеген.
Бакудағы дода 1 қыркүйекте мәресіне жетеді.
Мақаланың түпнұсқасы: https://kaz.nur.kz/sport/other-sports/2034164-qazaqstandyq-mergen-qyz-zuxra-irnazarova-nysana-kozdeuden-alem-cempiony-atandy/
