Сағындық Тоғамбай Азия ойындарында қола жүлдеге ие болды

Сағындық Тоғамбай бокстан жартылай финалда қытайлық боксшы Хан Сюэчжэньге қарсы жекпе-жегінде жеңіліп, Азия ойындарының қола жүлдегері атанды. Бұл туралы KAZ.NUR.KZ хабарлайды.

Ол 92 келіге дейінгі салмақ санатында жартылай финалға шығып, кем дегенде қола жүлдеге қол жеткізді. Алайда жеңістерінің тізбегін жалғастыра алмай қалды.

Сағындық Тоғамбай финалға шығу үшін қытайлық боксшы Хан Сюэчжэньге қарсы бағын сынап, есе жіберген.

Бірінші раундта қазақстандық боксшы басым болды. Бірақ екінші раундта Хан белсенділік танытып, Сағындықты рингте қыса бастады. Үшінші раундта болса қытайлық спортшы басым түсіп, Сағындыққа мүмкіндік берген жоқ. Ол Тоғамбайды нокдаунға түсіріп, жеңіске жетті.

Осылайша Сағындық Тоғамбай Жазғы Азия ойындарында қола жүлдегері атанды.

Айта кетейік, қазір Қазақстан құрамасы спортшыларының қоржынында үш алтын, бес күміс және 22 қола медаль бар.

Еске салсақ, бүгін, жексенбі күні Ханчжоудағы жазғы Азия ойындарында Қазақстан құрамасының тағы бір боксшысы жартылай финалға жолдама алғаны туралы жазған едік.

Мәтіннен қате тапсаңыз, бізге жазыңыз