Қазақстанда алғаш рет Азия семсерлесу конфедерациясының отырысы өтті

Алматыда Азия семсерлесу конфедерациясының (FСА) 35-ші бас ассамблеясы өтті. Жиын барысында Азиядағы семсерлесуді дамытуға қатысты мәселелер талқыланып, маңызды стратегиялық шешімдер қабылданды, деп хабарлайды KAZ.NUR.KZ.

Ассамблеяның отырысы Қазақстанда алғаш рет ұйымдастырылды. 2024-2025 жылға арналған негізгі азиялық жарыстардың өткізілу мерзімі мен орны бекітілді.

"Біз аймақтағы семсерлесу алдында негізгі міндеттерді қойып, ынтымақтастық пен бірлік үлкен жетістіктерге жетелейтінін дәлелдеу үшін бірігіп отырмыз. Азиялық семсерлесу конфедерациясы әлемдік семсерлесу аренасында маңызды орын алады және Қазақстанда бас ассамблеяның өткізілуі осы сәтке ерекше мән берді. Біз өңірде және одан тыс жерлерде семсерлесуді дамыту бойынша жұмысты жалғастыруға дайынбыз", - деп атап өтті Қазақстан Республикасы Ұлттық семсерлесу федерациясының президенті Мирболат Әбуов.

Ассамблея отырысы барысында Мирболат Әбуов Азия семсерлесу конфедерациясының вице-президенті болып тағайындалды. Азия конфедерациясы басшылығында Қазақстан өкілінің болуы құрлықтағы қазақстандық семсерлесу мүдделерін тиімді қорғауға мүмкіндік бермек.

Оған қоса Азия, Африка және Панамерикандық семсерлесу конфедерациялары арасындағы құрлықаралық ынтымақтастық туралы келісімге қол қою ерекше назар аударды. Бұл қадам әртүрлі құрлықтағы семсерлесушілердің байланысын нығайтып, оның одан әрі дамуына үлес қоспақ.

Мәтіннен қате тапсаңыз, бізге жазыңыз