Қазақстандық теннисші Александр Бублик Бельгияда өтіп жатқан Антверпен (Бельгия) ATP 250 турнирінің ширек финалына шықты. Ол жұптық сында ресейлік Александр Шевченкомен өнер көрсетті, деп хабарлайды ҚазАқпарат.
Отандасымыз 1/8 финалда ресейлік Александр Шевченкомен бірге бельгиялықтар Микаэль Гиртц — Готье Онклинге төтеп берді.
Бірінші партия Бублик пен Шевченконың еншісінде болса - 7:6 (7:4), екіншісінде бельгиялық дуэт қарымта қайтарды – 6:4.
Қазақстандық пен ресейлік жұп супер тай-брейкте жеңісті жұлып алды – 12:10.
Тартысты матч бір жарым сағатқа созылды. Қос Александр 7 эйс жасап, 6 брейк-пойнттың тең жартысын мүлт жібермеді. Гиртц пен Онклин 4 брейкпен (10 брейк-пойнт) көзге түсті.
Ширек финалдағы қарсыластары кейін анықталады.
Айта кетейік, Александр Бублик жекелей сында 3-ракетка болып тіркелгендіктен, жарысты екінші айналымнан бастайды.
Мақаланың түпнұсқасы: https://kaz.nur.kz/sport/other-sports/2041287-aleksandr-bublik-belgiyadagy-turnirdin-sirek-finalyna-syqty/
