Қазақстанның бірінші, әлемнің 4-ракеткасы Елена Рыбакина WTA қорытынды турнирінде әлемнің 1-ракеткасы Арина Соболенкодан жеңіліп, жартылай финалға шыға алмады, деп хабарлайды KAZ.NUR.KZ.
Қазақстандық және белоруссиялық теннисшілер топтық кезеңнің үшінші туры аясында кездесті.
Елена Рыбакина мен Арина Соболенко арасындағы матч негізі 3 қарашаға қараған түні басталған еді. Алайда ауа райының қолайсыздығына байланысты екінші сет кезінде матч тоқтатылып, ойын келесі күнге, 4 қарашаға ауыстырылған болатын.
Сенбіге қараған түні матч қайта жалғасып, Рыбакина екінші сетте ұтқанымен, жалпы ойын қорытындысы бойынша Беларусь өкіліне 2:6, 6:3, 3:6 есебімен жол берді.
Айта кетейік, WTA қорытынды турнирі Мексиканың Канкун қаласында өтіп жатыр. Елена Рыбакина мен Арина Соболенко арасындағы матч 2 сағат 27 минутқа созылды.
Мақаланың түпнұсқасы: https://kaz.nur.kz/sport/other-sports/2044097-wta-qorytyndy-turniri-elena-rybakina-sobolenkodan-zenilip-zartylai-finalga-syga-almady/
