Теннистен Қазақстан құрамасы Әлем чемпионатының топтық кезеңінен шыға алмады: Рыбакина неге қатыспады

Теннистен Қазақстан ұлттық құрамасы үшін Испаниядағы Әлем чемпионаты аяқталды. Топтық кезеңдегі барлық қарсыластарымызға есе жібердік, деп хабарлайды KAZ.NUR.KZ.

Испанияның Севилья қаласында теннистен Билли Джин Кинг турнирі өтіп жатыр. Қазақстан үлттық құрамасы Словения және Аустралия командаларымен "В" тобында өнер көрсетті. Алайда екі ұжымға да жеңіліп қалды. Қазақстандық спортшылар жарыстың алғашқы күні Аустралия ұжымына 1:2 есебімен жеңілген еді. Ал бүгін Словения ұлттық құрамасына қарсы сәтсіз ойын көрсетіп, топтық кезеңнен шыға алмады.

Словенияға қарсы кездесудің бірінші ойыны қазақстандық Анна Данилина мен словениялық Кайе Юван арасында өтті. Орталық Еуропадан келген теннисші 1:6 және 0:6 есебімен жеңіске жетті.

Екінші кездесуде қазақстандық Юлия Путинцева словениялық Тамара Зиданшекке бірінші сетте 2:6 есебімен жеңілді. Осылайша Қазақстан құрамасы жарысты топтық кезеңнен аяқтады.

Айта кетейік, Қазақстанның бірінші, әлемнің төртінші ракеткасы Елена Рыбакина жарақатына байланысты кортқа шыға алмады. Теннистен Қазақстан ұлттық құрамасының капитаны Ярослава Шведова Рыбакинаның жарақатына қатысты ресми мәлімдеме жасаған еді:

"Канкунда өткен турнир көп спортшылар үшін ауыр болғаны белігілі. Теннисшілердің көбі жарыс кезінде жарақат алып қалды. Біздің спортшы Елена Рыбакина да солардың қатарында".

Мәтіннен қате тапсаңыз, бізге жазыңыз