Сауд Арабияның "Әл-Иттихад" клубының шабуылшысы Карим Бензема Instagram желісіндегі парақшасын өшіріп тастады. Бұл туралы KAZ.NUR.KZ тілшісі хабарлайды.
Сауд Арабия Премьер лигасының 17-туры аясында Роналду бастаған "Әл-Наср" мен құрамында Карим Бензема бар "Әл-Иттихад" клубтары ойнаған еді. Нәтижесінде "Әл-Иттихад" командасы 5-2 есебімен ойсырай жеңілді. Осы ойыннан кейін Бензема Instagram желісіндегі парақшасын өшіріп тастады. Оның 76 миллион оқырманы бар еді.
Бензема Сауд Арабияның спорт журналистері арасында сынға ұшырады. Танымал журналист Валид әл-Фарадж Карим туралы:
"Бензема мен жанкүйерлер арасындағы алшақтық күннен-күнге артып келеді. Ол ойнап жүрген жоқ және жағдайды өзгерте алмады. Бензема жанкүйерлерге: "Мен сендермен жай ғана көңіл көтеріп жүрмін", – дейтін сияқты. Роналду болса қаңтарда келгенде, ойнағысы келетінін білдірді, бірақ Бензема өз командасына ештеңе ұсына алмады. Ол әріптестеріне ұнамайтын сияқты және өзін ыңғайсыз сезінеді. Себебін білмеймін", – деді Валид.
Айта кетейік, Бензема "Әл-Иттихад" клубына 2023 жылдың жазында қосылды. Осы маусымда 20 ойын өткізіп, 12 гол мен 5 нәтижелі пас авторы атанды.
Қазір Сауд Арабиясы чемпионатының турнир кестесінде "Әл-Иттихад" 28 ұпаймен 6-орында тұр. "Әл-Наср" клубы 43 ұпай еншілеп, 2-орынға жайғасқан.
Мақаланың түпнұсқасы: https://kaz.nur.kz/sport/other-sports/2053115-benzema-ariptesterine-unamaidy-karim-instagram-dagy-paraqsasyn-osirip-tastady/
