"Ол UFC чемпионы болуға лайық": Ризабек Айтмұхан қазақстандық файтер туралы пікірін айтты

Еркін күрестен әлем чемпионы Ризабек Айтмұхан қазақстандық файтер Асу Алмабаевтың UFС-дегі кезекті жекпе-жегіне қатысты пікірін айтты. Бұл туралы KAZ.NUR.KZ Sport Plus Qazaqstan телернасының ресми сайтына сілтеме жасап хабарлайды.

Асу Алмабаев пен Ризабек Айтмұхан Dar Team жекпе-жек клубының залында бірге жаттығады.

"Асу сияқты жауынгерлер Қазақстанның даңқын көтереді. Мен оның жақсы қасиеттерін сіңіруге тырысамын. Ол – өте мықты, ақылды және көңілді адам. Асу UFC чемпионы болуға лайық. Біздің барлық жігіттерге сәттілік тілеймін!", – деді Ризабек.

Айта кетейік, Асу Алмабаев UFC-дегі екінші жекпе-жегіне дайындалып жатыр. Ол 9 наурызда Майамиде (Флорида штаты) өтетін UFC 299 турнирі аясында жергілікті файтер Си Джей Вергарамен күш сынасады. Бұл кездесуге Алмабаев АҚШ-тағы Kill Cliff FC спорт залында Генри Хуфт және Саид Сапаровтың жетекшілігімен жаттығып жатыр.

Өткен жылы тамыз айында Асу Алмабаев АҚШ-та өткен UFC Fight Night турнирінде америкалық Оди Осборнды (12-6 есебімен) қылқындыру әдісімен ұтты. Бұл оның UFС-дегі дебюті болды. 30 жастағы қазақстандық файтер барлығы 15 кездесу өткізген. 13 мәрте жеңсе, 2 рет жеңіліске ұшыраған.

Мәтіннен қате тапсаңыз, бізге жазыңыз