"Тарихи жеңіс": қазақстандық садақшы қыз Түркиядағы халықаралық турнирде алтын медаль жеңіп алды

Дәстүрлі садақ атудан Қазақстан ұлттық құрамасының мүшесі Айкөркем Батихан Стамбұлда (Түркия) өткен он екінші Fetih Cupasi халықаралық турнирінің жеңімпазы атанды. Бұл туралы KAZ.NUR.KZ Туризм және спорт министрлігінің Instagram желісіндегі ресми парақшасына сілтеме жасап хабарлайды.

Айкөркем әлемнің түкпір-түкпірінен жиналған 100-ге жуық сұрмергеннің арасынан топ жарды.

"Бұрын-соңды жеңіс шыңы бұйырмаған турнирдің алтын жүлдесін иеленіп, Қазақстанға тарихи жеңіс сыйлады", - делінген хабарламада.

Ұлттық жəне ат спорты түрлері орталығының мәліметінше, Айкөркем Батихан финалға шығар алдында Түркия елінің мақтанышы, Fetih Cupasi жарысының бірнеше дүркін чемпионы Сена Кечеджиді 5:2 есібімен ұтқан.

Бұл жарыс 50 метр қашықтықта диаметрі 50 сантиметр болатын пута нысанасы бойынша өткен. 25-30 мамыр аралығында болған халықаралық турнирге 100 әйел спортшы, 180 ер спортшы қатысқан.

Мәтіннен қате тапсаңыз, бізге жазыңыз