Астаналық Төлеген Бейісмолдаев 60 жасында Азия чемпионатының жүлдегері атанған. Бұл туралы KAZ.NUR.KZ "Таңшолпан" бағдарламасының Instagram желісіндегі ресми парақшасына сілтеме жасап хабарлайды.
Ардагер спортшының дзюдомен айналысып жүргеніне жарты жыл болды. Ол осы уақыт ішінде дзюдодан ардагерлер арасында Азия чемпионатының жүлдегері атанып үлгерді. Қазір спортшы әлем чемпионатына дайындалып жатыр.
"Осы әрекетіммен жастарға үлгі көрсеткім келеді. Жастар спортпен айналысуы керек. Менің жасым 60-тан асса да, Қазақстанның туын мінберде көтеру – арманым", - деді Төлеген Бейісмолдаев.
Бапкер Рамазан Тәубәнің айтуынша, ардегер спортшы жаттығу залына күн сайын келеді.
"Жастармен қалыспай жаттығу жасайды. Кейде жастар шаршап қалған кезде Төлеген ағамыз намысқа тырысып, еңбектенеді. Мұнда кәсіби спортшылар бар. Соларға да ағамыз үлгі болып жүр", - деді жаттықтырушы.
Еске салайық, 64 жастағы маңғыстаулық азамат Рәббім Байбозұлы Парижде өтетін жазғы Олимпиадаға велосипедпен аттанғанын жазған едік.
Мақаланың түпнұсқасы: https://kaz.nur.kz/sport/other-sports/2112486-zhastarga-ulgi-bolgym-keledi-60-zhastagy-astanalyq-dziudoshy-aziia-chempiony-atandy/
