Қазақстандық төрт теннисші Уимблдон турнирінің іріктеу кезеңін жеңіспен бастады

Қазақстандық төрт теннисші Ұлыбританияда өтіп жатқан Уимблдон турнирінің іріктеу кезеңін жеңіспен бастады. Бұл туралы KAZ.NUR.KZ Қазақстан теннис федерациясының ресми сайтына сілтеме жасап хабарлайды.

Михаил Кукушкин алғашқы кездесуін дүниежүзілік рейтингте 278-орында тұрған украиналық Виталий Сачкоға қарсы өткізді. Бұл ойында Кукушкин екі сетте де 6:3 есебімен жеңіске жетті. Енді қазақстандық теннисші іріктеу жарысының жартылай финалында әлемнің 152-ракеткасы, франциялық Бенджамин Бонзимен кездеседі.

Денис Евсеев рейтингте өзінен 8 саты төмен тұрған франциялық Маттео Мартинодан басым түсті. Екі сағат 20 минутқа созылған кездесуде Евсеев 6:7 (4:7), 6:2, 7:6 (10:7) есебімен ұтты. Оның ендігі қарсыласы – әлемнің 133-ракеткасы, франциялық Титуан Дрогет.

Ал Бейбіт Жұқаев әлемнің 154-ракеткасы, аустралиялық Юрий Родионовты жарыс жолынан тайдырды – 7:6 (7:5), 7:6 (9:7).

Тағы бір қазақстандық теннисші Тимофей Скатов әлемнің 158-ракеткасы, италиялық Андреа Пеллегриноны 6:3, 6:3 есебімен жеңді. Скатов келесі айналымда рейтингте 129-сатыда тұрған словакиялық Лукаш Клейнге қарсы ойнайды.