Қазақстандық теннисші Александр Бублик Франция астанасы Париждегі жазғы Олимпиада ойындарының алғашқы айналымында ұтылды. Бұл туралы KAZ.NUR.KZ тілшісі хабарлайды.
Александр Бублик теннис турнирінің алғашқы айналымында ATP рейтингінде 11-орында тұрған АҚШ өкілі Тэйлор Фрицке қарсы ойнады. Бұл матчта қазақстандық теннисші 2:0 (4:6, 4:6) есебімен жеңіліп қалды.
Еске салайық, осыған дейін 2 қазақстандық теннисші Париж Олимпиадасына қатыспайтыны белгілі болған еді. Қазақстанның бірінші, әлемнің төртінші ракеткасы Елена Рыбакинаның өкпесі қабынып, дәрігерлер жарыс алаңына шығуға рұқсат бермеген. Ал Юлия Путинцева тізе жарақатына байланысты төрт жылдықтың басты бәсекесінен шығып қалды.
Енді теннистен Қазақстан құрамасы сапынан Олимпиада ойындарында жекелей сында Александр Шевчкенко бақ сынайды. Ол чехиялық Якуб Меншикпен шеберлік байқасады.
Мақаланың түпнұсқасы: https://kaz.nur.kz/sport/other-sports/2140644-qazaqstandyq-tennisshi-parizh-olimpiadasyn-aiaqtady/
