Алғашқы жүлде ел қоржынында: қазақстандық спортшы аударыспақтан көшпенділер ойындарының чемпионы атанды

60 кг салмақта сынға түскен Қазақстан ұлттық құрамасының спортшысы Ермек Құралбай алтын медальға ие болды. Бұл туралы KAZ.NUR.KZ Ұлттық және ат спорт түрлері орталығының баспасөз қызметіне сілтеме жасап хабарлайды.

Астанада өтіп жатқан V Дүниежүзілік көшпенділер ойындары аясында аударыспақтан Қазақстан құрамасының мүшесі Ермек Құралбай финалда Қырғызстан спортшысын жеңді.

"Жақсы дайындықпен келдім. Финалдағы қарсыласым – былтыр ат үстіндегі күрестен 60 кг салмақта чемпион болған қырғыз палуаны. Ел намысын қорғап, бірінші орын аламыз деп үміттенген едім. Сенімді ақтағаныма қуаныштымын", - деді Ермек Құралбай.

Айта кетейік, "Қазанат" ипподромы маңындағы этноауылда өтіп жатқан аударыспақтан бәсекеге 9 мемлекеттен 64 спортшы тіркелді.

10 қыркүйекте Есімхан Рахматіллә, Сырым Ізбасаров және Біржан Қосалиев сынға түседі.

Мәтіннен қате тапсаңыз, бізге жазыңыз