Астанада өтіп жатқан самбодан әлем чемпионатында Қазақстан қоржынына алғашқы алтын медаль түсті. Бұл туралы KAZ.NUR.KZ Спортты дамыту дирекциясының баспасөз қызметіне сілтеме жасап хабарлайды.
Спорттық самбодан аса ауыр салмақта бақ сынаған Темірлан Көлбай (+98 кг) финалда моңғолиялық спортшы Пуревдорж Дамдинчуренді жеңіп, алтын жүлде еншіледі. Қазақстандық спортшы жарыс барысында Кеничи Накаяма (Жапония), Бред Флорес (Гондурас), Нұрбек Тураевты (Өзбекстан), жартылай финалда Степан Солдатенковты (FIAS) ұтқан.
Сондай-ақ бүгін Қазақстан құрамасының спортшылары 4 қола жүлдеге ие болды. Спорттық самбодан Армат Қабдолов (58 кг) мен Арайлым Әбенова (+80 кг), ал жауынгерлік самбодан Құралай Кабрайқызы (54 кг) мен Маратбек Рахметоллин (64 кг) үшінші орын алды.
Астанадағы әлем чемпионатына 80 мемлекеттен 470 спортшы жиналған. Ал Қазақстан намысын 28 самбошы қорғайды. 10 қарашаға дейін жалғасатын додада спорттық және жауынгерлік самбо шеберлерінен бөлек, зағип жандар (SVI-1) 31 жүлде жиынтығын сарапқа салады. Биылғы әлем чемпионатының ерекшелігі – әйелдер арасында жауынгерлік самбо мен зағиптардың сайысы бірінші мәрте енгізілуі.
Жарыстың жалпы жүлде қоры – 311 мың АҚШ доллары (1-орын – 4 000 доллар, 2-орын – 3 000 доллар, 3-орын – 2 000 доллар және зағиптар арасындағы чемпион – 1 000 доллар).
Осыған дейін Астанада 2005 жылы қарашада спорттық самбодан әлем чемпионаты өтіп, ұлттық құрама 1 алтын, 3 күміс, 6 қола медаль жеңіп алған еді.
Мақаланың түпнұсқасы: https://kaz.nur.kz/sport/other-sports/2185110-qazaqstandyq-sportshy-sambodan-alem-chempiony-atandy/
