Футболдан Қазақстан ұлттық құрамасының бас бапкері Станислав Черчесов әкесінің атын қате айтқан журналиске әзілмен жауап берді. Бұл туралы KAZ.NUR.KZ тілшісі хабарлайды.
Кеше, 13 қарашада футболдан Қазақстан ұлттық құрамасының ойын алды баспасөз мәслихаты өтті. Сол кезде журналистердің бірі бас бапкердің әкесінің атын Саламович емес, "Салманович" деп қате айтқан.
"Мен де ренжи аламын. Әкемнің атын қате айтып жатыр. Бірақ ештеңе етпейді, біз өкпешіл емеспіз, бұған үйреніп алғанбыз. Мен Саламовичпін. Орысша – Приветович", - деп әзілдеді Черчесов.
Бұған дейін Станислав Черчесов әзілі үшін басы дауға қалған болатын. Ол 13 қазанда Алматыда өткен Қазақстан – Словения матчынан кейінгі баспасөз мәслихатында қазақ тілінде сұрақ қойған журналиске: "Сен французша сөйлеп отырсың ба?" - деген еді. Осыдан кейін Черчесов көпшіліктің сынына ұшырап, оған футбол федерациясы тарапынан 738 400 теңге айыппұл салынды.
Айта кетейік, Станислав Черчесов биыл маусымда футболдан Қазақстан ұлттық құрамасының бас бапкері болып тағайындалды. Оның жетекшілігімен Қазақстан құрамасы Ұлттар лигасында төрт ойын өткізіп, үш мәрте жеңілсе, бір рет қарсыласпен тең түсті. Ал бүгін, 14 қарашада Черчесов шәкірттері Алматыда Аустрия командасына қарсы қарымта ойын өткізеді.
Мақаланың түпнұсқасы: https://kaz.nur.kz/sport/other-sports/2187207-men-de-renzhi-alamyn-cherchesov-akesining-atyn-qate-aitqan-zhurnaliske-zhauap-berdi-video/
