"Мәйітхана толып кетті": Гвинеяда футбол матчында бірнеше адам қаза тапты (видео)

Гвинеяның Нзерекор қаласында өткен футбол матчындағы жанкүйерлер қақтығысынан бірнеше адам қаза тапты. Бұл туралы KAZ.NUR.KZ DNA басылымына сілтеме жасап хабарлайды.

Дәрігерлердің бірі 100-ге жуық адам көз жұмғанын айтса, енді бірі қаза тапқандардың саны 10 шақты екенін жеткізді. Жанкүйерлер арасындағы қақтығыс төрешінің ойыншыға алдымен қызыл қағаз көрсетіп, кейін қарсылас қақпасына пенальти белгілеген соң басталған.

"Аурухананың барлық жерінде, тіпті кіреберістегі еденде адамдардың денесі жатыр. Мәйітхана да толып кетті", - деді жергілікті дәрігерлердің бірі.

Полиция жанкүйерлерді таратып жіберу үшін көз жасаурататын газ қолданған. Тәртіп сақшыларынан қашпақ болған адамдар есікке қарай жүгіріп, сол жерде бір-бірін таптап кеткен. Басылымның хабарлауынша, матч 2021 жылы төңкеріс нәтижесінде билікке келген, Гвинеядағы бүлікшілердің жетекшісі полковник Мамаду Думбияның құрметіне ұйымдастырылған.

Еске салайық, Перуде 35 жастағы футболшы Хосе Уго де ла Крус Меса матч кезінде найзағай соғып, қайтыс болған еді.

Мәтіннен қате тапсаңыз, бізге жазыңыз