Шымкент полицейлері халықаралық футбол турнирінде жеңіске жетті (видео)

Шымкент қаласының әкімі Ғабит Сыздықбеков Нидерландының Эйберген қаласында өткен шағын футболдан World Police Indoor Soccer Tournament халықаралық турнирінде жеңімпаз атанған полиция қызметкерлерімен жүздесті. Тәртіп сақшылары ҚР ІІМ құрама командасында өнер көрсеткен, деп хабарлайды Өңірлік коммуникациялар қызметі.

ӨКҚ Instagram-дағы мәліметінше, қала басшысы чемпиондарды шын жүректен құттықтап, олардың Қазақстан абыройын әлемдік деңгейде лайықты қорғағанын атап өткен. Сондай-ақ ІІМ құрама командасында тек Шымкент полиция департаментінің өкілдері болғаны қала үшін үлкен мақтаныш екенін ерекше айтқан.

Әкім спортшылардың өскелең ұрпаққа салауатты өмір салтын ұстанудың және спортпен шұғылданудың маңыздылығын үлгі еткенін атап өтіп, оларға қызметтерінде жаңа жетістіктер мен табыстар тіледі.

Сонымен қатар алдағы уақытта да жүктелген міндеттерін адал орындайтындарына сенім білдірді.