17 жастағы қазақстандық теннисші әлемдік рейтингте алғаш рет үздік бестікке енді

Теннисші Әмір Омарханов Халықаралық теннис федерациясының (ITF) жасөспірімдер арасындағы жаңа рейтингінде үздік бестікке кірді. Бұл туралы KAZ.NUR.KZ Olympic.kz сайтына сілтеме жасап хабарлайды.

17 жастағы Әмір Омарханов рейтингте он сатыға жоғарылап, төртінші орынға тұрақтады. Ол мансабында алғаш рет ТОП-5 қатарына кірді. Өткен маусымда Омарханов Бейжіңде өткен J300 турнирінде жекелей сындағы жарыста топ жарды. Бұдан бөлек жұптық сында үш ірі жарыста, соның ішінде бейресми әлем чемпионаты саналатын Orange Bowl турнирінде жеңіске жетті.

Әлемдік жасөспірімдер рейтингінде Занғар Нұрланұлы да жоғарылады. 16 жастағы қазақстандық теннисші 38-орынға көтерілді (+36). 2024 жылы Нұрланұлы жекелей сында үш ірі титулды жеңіп алды. Атап айтқанда, Измирдегі J100, Шымкенттегі J200 және Латвиядағы J100 жарыстарында үздік шықты.

Тағы бір қазақстандық теннисші Дамир Жалғасбай ТОП-100-ге жақындап қалды. Қазір ол 112-орында (+84) тұр. Дамир былтыр Краковта өткен турнирде жеңіске жеткен еді.

Еске салайық, Бүкіләлемдік әйелдер теннис қауымдастығының (WTA) жекелей және жұптық сындағы жаңартылған рейтингінде қазақстандықтар қай орында екенін жазғанбыз.

Мәтіннен қате тапсаңыз, бізге жазыңыз