Универсиада-2025: Қазақстандық шорт-трекшілер ел қоржынына медаль салды

Шорт-тректен Қазақстан құрамасы Италияда өтіп жатқан (Турин) Универсиадада аралас эстафета бойынша қола медаль алды, деп хабарлайды KAZ.NUR.KZ.

Шорт-тректен Қазақстан командасы 2000 метрге сырғанаудан аралас эстафетада қола жүлдеге қол жеткізді. Отандық спортшылар 2 минут 44.815 секундта мәреге жетті. Осылайша ұлттық құрама үшінші орынға тұрақтады.

Қазақстан намысын шорт-трекшілер атынан Алина Әжғалиева, Малика Ермек, Яна Хан, Валерий Клименко, Динмухамедалдияр Тәжібай қорғады.

Аралас эстафетада алтын медальді Оңтүстік Корея спортшылары иеленді. Ал күміс жүлде Қытай шорт-трекшілерінің еншісіне бұйырды.

Қазіргі таңда Универсиадада Қазақстан 13 жүлде алып үлгерді (3 алтын, 4 күміс және 6 қола). Италияның Турин қаласында өтіп жатқан жарыстар 26 қаңтарға дейін созылады.