Илон Маск алғаш рет әлемдегі ең бай адам атанды

Әйгілі бизнесмен Илон Маск Forbes нұсқасы бойынша алғаш рет әлемнің ең бай адамдары тізімінде көш бастады, деп хабарлайды KAZ.NUR.KZ тілшісі.

Forbes журналының мәліметінше, қазіргі таңда Илон Масктың байлығы 219 миллиард доллар деп бағаланып отыр. SpaceX компаниясының негізін қалаушы бір жылда 68 миллиард долларға байыған.

Осылайша, Илон Маск бұған дейін әлемдегі ең бай адам саналып келген Amazon компаниясының негізін қалаушы Джефф Безосты басып озған. Байлығы 171 миллиард доллар деп бағаланған Джефф Безос рейтингте екінші орынға сырғыды.

Үздік үштікті Louis Vuitton Moët Hennessy (LVMH) компаниялар желісінің президенті Бернар Арно қорытындылап отыр. Оның байлығы - 158 миллиард доллар.

Әлемдегі ең бай адам атанған Илон Маскқа келсек, оның электромобильдер шығаратын Tesla компаниясының акциясы өскеннен кейін бизнесменнің байлығы да арта түскен.

Ал Джефф Безос басқаратын Amazon компаниясының акциясы керісінше құлдырап, бизнесмен 6 млрд долларын жоғалтқан.

Мәтіннен қате тапсаңыз, бізге жазыңыз