Қарақалпақстандағы тәртіпсіздіктер кезінде қанша адамның көз жұмғаны белгілі болды

Опубликовано:

Аурухана
Көрнекі сурет: pixabay.com

Өзбекстанның Бас прокуратурасы мен Ұлттық гвардиясы Қарақалпақстан астанасы Нүкістегі тәртіпсіздіктер кезінде 18 адамның қаза тапқанын хабарлады, деп жазады KAZ.NUR.КZ тілшісі "Газета.uz" басылымына сілтеме жасап.

Басылымның мәліметінше, 1-2 шілдеде Нүкісте өткен шеру кезінде 243 адам түрлі жарақат алған, оның 38-і құқық қорғау органдарының қызметкері. Бүгінде зардап шеккен 149 адам үйіне жіберілген, қалған 94 азамат ауруханада жатыр.

Өзбекстан Ұлттық гвардиясы баспасөз қызметінің жетекшісі Даврон Жуманазаровтың сөзінше, 1-2 шілде күні 516 адам ұсталған. Ұсталғандарға қатысты тергеу амалдары жүргізілуде, олардың кейбірі әкімшілік жазаға тартылды.

"3 шілдеден 4 шілдеге қараған түні көшеде мақсатсыз жүрген 110 адам (21:00-ден 07:00-ге дейін) коменданттық сағат талаптарын бұзғаны үшін ұсталды. 12 көлік құралы айып тұрағына қойылды", - делінген Өзбекстан Ұлттық гвардиясының мәлімдемесінде.

Айта кетейік, Қарақалпақстан астанасы Нүкісте бірнеше күн бұрын Өзбекстан Конституциясына енгізілгелі отырған түзетулерге қарсы болғандар наразылыққа шыққан еді.

1992 жылдың 8 желтоқсанында қабылданған құжатта Қарақалпақстан референдум негізінде Өзбекстан құрамынан шығуға құқығы бар егемен ел деп көрсетілген. Алайда Конституцияға енгізілгелі отырған жаңа түзетулерге сәйкес, бұл норманы алып тастау көзделген болатын.

Халықтың наразылығынан кейін Шавкат Мирзиеев Қарақалпақстан егенмендігіне қатысты Конституцияға енгізгелі отырған түзетулерді алып тастау туралы қаулыға қол қойды.

Одан бөлек Өзбекстан президенті Қарақалпақстан аумағында ТЖ режимін енгізді.

Мақаланың түпнұсқасы: https://kaz.nur.kz/world/1976855-qaraqalpaqstandagy-tartipsizdikter-kezinde-qansa-adamnyn-koz-zumgany-belgili-boldy/

jitsu gif