Синдзо Абэнің қазіргі жағдайы мен оған қастандық жасаған адамның кім екені белгілі болды

Жапонияның қазіргі премьер-министрі Фумио Кисида бұрынғы премьер-министрі Синдзо Абэнің жағдайы әлі де ауыр екенін айтты, деп хабарлайды РИА Новости жапондық БАҚ-қа сілтеме жасап.

"Бүгін Нара префектурасында бұрынғы премьер-министр Абэге шабуыл жасалды. Оның жағдайы өте ауыр", - дейді Кисида баспасөз мәслихатында.

Сондай-ақ РИА-Новости Telegram-арнасында жапондық БАҚ-қа сілтеме жасап, Синдзо Абэнің қастандық жасалғаннан кейін әлі есін жимағанын хабарлады.

Ал ТАСС агенттігі "Споцу хоти" басылымына сілтеме жасап, экс-премьерге қан құйылып жатқанын жеткізді.

Сонымен қатар РИА-Новости жапондық БАҚ-қа сілтеме жасап, Синдзо Абэге оқ атқан адамның кім екені анықталғанын мәлім етті.

Басылымның жазуынша, күдікті - Нара қаласының тұрғыны Тэцуя Ямагами. Ол 2005 жылға дейін жапон теңіз флотының өзін-өзі қорғау күштерінде үш жыл қызмет еткен. Тұтқындау кезінде ер адам қарсылық көрсетпеген.

Еске сала кетейік, Жапонияның бұрынғы премьер-министрі Синдзо Абэге бүгін, 8 шілдеде жергілікті уақыт бойынша 11:30-да (Нұр-Сұлтан уақыты бойынша 08:30) Нара қаласындағы көшелердің бірінде сөз сөйлеп тұрған сәтте қастандық жасалады.

Жараланған Синдзо Абэ шұғыл түрде тікұшақпен ауруханаға жеткізілген. Нара университетінің ауруханасы экс-премьердің өздеріне жеткізілгенін растаған.

Осы орайда мемлекет басшысы Қасым-Жомарт Тоқаев Синдзо Абэнің тезірек сауығып, отбасына оралуына тілектестік білдірді.