Түркияның оңтүстігіне бірнеше зымыран құлады: қайтыс болғандар бар

Түркияның Каркамыш қаласына жасалған зымырандық соққының салдарынан тұрғын үйлер мен мектеп ғимараты зардап шекті. Соққы Сирия аумағынан жасалған деген болжам бар, деп хабарлайды KAZ.NUR.KZ Anadolu ақпарат агенттігіне сілтеме жасап.

Түркияның Газиантеп провинциясындағы Каркамыш қаласының тұрғын үйлеріне зымырандардың құлағаны хабарланды. Агенттік мәліметінше, барлығы бес снаряд атылған. Газиантеп губернаторы Давут Гүлдің айтуынша, екі адам қаза тауып, тағы алты адам жараланған.

Кейінірек РИА Новости агенттігінің хабарлауынша, Түркияның ішкі істер министрі Сүлейман Сойлу құрбандар саны үшке жеткенін хабарлады. Олардың арасында бала да бар.

Жергілікті ақпарат көздерінің хабарлауынша, жарылыс қаладағы лицейлердің бірінің ғимаратының аумағында болған. Сонымен қатар екі тұрғын үйге де снаряд түскені туралы ақпарат бар. Сондай-ақ бір снарядтың Каркамыш бекетінің маңында жүк көлігіне түскені айтылады.

Болжам бойынша, зымыран Сирияның солтүстігінен атылған. Түрік билігі КЖП-ның сириялық қанаты болып табылатын YPG – күрдтердің халықтық қорғаныс бөлімшелерінің мүшелері деп күдіктенеді. Екі ұйым да Түркияда террористік ұйым деп танылған.

Сонымен бірге күрдтердің Firat ақпарат агенттігі Түркия Сирияның Кобани қаласының батысындағы Зормиксар, Ашме, Шекслер, Кесра Ахмед Мунир және Визит ауылдарын ауыр қарулармен атқылап жатқанын хабарлады.

Еске салайық, кеше Түркияның Сирия мен Ирактың солтүстігіндегі күрд құрылымдарының позицияларына әуеден соққы бергені белгілі болды. Бұл мәліметтерді елдің Қорғаныс министрлігі растады.

Бұған дейін Түркия Стамбұлда 13 қарашада болған лаңкестік әрекетке КЖП-ның қатысы бар деп мәлімдеген еді. Жарылыс Стамбұл орталығындағы жаяу туристік Истикляль көшесінде болды. Жарылыстан 81 адам қаза тауып, кем дегенде 6 адам қаза тапқаны хабарланған болатын.