Акулалар көбейген: Таиландта туристерге теңізге тек тізеге дейін түсуге рұқсат етілді

Таиландтың оңтүстік-батыс бөлігінде орналасқан танымал туристік Ко-Пхи-Пхи-Ле аралындағы Майя шығанағына акулалар тола бастады. Енді туристер суға тек тізесіне дейін түсе алады, деп хабарлайды KAZ.NUR.KZ Турпром сайтына сілтеме жасап.

2018 жылы жергілікті билік туристер санының артуы экожүйеге, қоршаған ортаға зиян тигізетініне алаңдап, аралдың халық үшін уақытша жабылатынын хабарлаған еді. Бастапқыда шектеу төрт айға ғана созылуы керек болатын, бірақ коронавирустық пандемия мен басқа да оқиғалардың салдарынан ол төрт жылға созылды.

Осы уақыт ішінде арал маңындағы акула популяциясы толық қалпына келіп үлгерген.

2022 жылы билік аралға шектелген туризмге рұқсат беріп, акулалар санын бақылауды жалғастырды. Бірақ туристердің қайта оралуымен популяция санының азайып кеткені анықталады. Табиғат қорғаушылары шектеулерді күшейтуді талап еткенімен, билік бұған асығар емес.

Пандемияға дейін туризм Таиландтың ЖІӨ-нің 12 пайызын құрады, ал Пхи Пхи аралындағы ұлттық саябақтың кірісі туризмге тыйым салынғаннан бері екі есеге дерлік азайған.

"Шектеулердің арқасында біз акулаларға әсерді азайтып, туризм мен қоршаған ортаның бірге өмір сүруінің жақсы жолын таба аламыз деп үміттенеміз", – дейді теңіз зерттеушісі Метави Чуангчароенди.

Қазіргі уақытта аралға баруға арнайы шектеулер мен ережелер бар. Сонымен, туристік қайықтар аралдың келесі бетінде арқандаулы тұрса, келушілер жағажайға жаяу жүруі керек. Жағажайларда сағатына рұқсат етілген келушілер саны 375-ке дейін шектелген. Суға ең көп тізе тереңдігіне дейін түсуге рұқсат етіледі.