Пәкістанда съезд кезінде жарылыс болып, 40-тан астам адам қаза тапты (видео)

Пәкістанда жексенбі күні, 30 шілдеде "Жамиат Улема-и-Ислам" ("Ислам діні өкілдерінің жиыны") партиясының съезінде жарылыс болды. 40-тан астам адам көз жұмды. Бұл туралы CNN хабарлайды.

Жергілікті полицияның хабарлауынша, шабуылдан кемінде 44 адам қаза тапқан, тағы 100 адам ауруханаға жеткізілді, зардап шеккендердің ішінде 17-сі ауыр жағдайда жатыр.

Басылым мәліметінше, теракт Ауғанстанмен шекараға жақын жерде орналасқан Хар қаласында болған. Құқық қорғау органдарының хабарлауынша, жанкешті-террорист исламдық партияның съезіне жарылғыш зат әкеліп, оны партия өкілдері сөйлеп тұрған сахна маңында жарып жіберген.

Куәгерлердің айтуынша, жарылыс болған күні съезд жұмысына 500-ге жуық адам қатысқан.

Басылымда әзірге ешбір ұйымның шабуылды өз мойнына алмағаны атап өтілді.

Пәкістан премьер-министрінің кеңсесінде жарылысқа қатысты тергеу басталғаны туралы хабарланды.

Сондай-ақ CNN ақпаратынша, пәкістандық саяси партиялар биылғы жылдың соңында өтетін сайлау науқанына дайындықты бастаған.

Anadolu агенттігі 2023 жылдың бірінші жартыжылдығында Пәкістандағы лаңкестік әрекеттер саны 79 пайызға артқанын жазады - алты айда ел ішінде 271 теракт орын алып, салдарынан 389 адам мерт болды.