Тель-Авивтен ұшып кетпек болған Германия канцлері мен оның командасы ұшақтан қауіпсіз жерге шығуға мәжбүр болды (фото, видео)

Тель-Авивтен ұшып кетпек болған Германия канцлері Олаф Шольц пен оның командасы әуе дабылына байланысты ұшақтан қауіпсіз жерге шығуға мәжбүр болды.

Politico басылымының хабарлауынша, канцлер ынтымақтас екенін білдіру үшін, сондай-ақ Газа секторындағы Палестинаның бейбіт тұрғындарына көрсетілетін гуманитарлық көмекті арттыру үшін сейсенбі күні Израильге барған.

Әуе дабылы қағылған уақытта Шольц Бен-Гурион әуежайында болған. Ол ұшуға дайындалып жатқан.

Әлеуметтік желіде жарияланған видеодан Шольц пен оның командасының шұғыл түрде ұшақтан шығып, ұшу-қону жолағы маңында жерге жата кеткенін көруге болады.

Басылымның мәліметіне сүйенсек, Шольц паналайтын арнайы жерге эвакуацияланған.

Welt неміс басылымының бас редакторының орынбасары Робин Александр X желісіндегі микроблогында бұл жайт туралы жазып, фото жариялаған.

Сондай-ақ Spigel журналисі Сара Сиверт де X желісіндегі блогында дабыл қағылған кезде Шольц делегациясының ұшақтан шығып жатқан сәтінен видео жариялаған.

Мәтіннен қате тапсаңыз, бізге жазыңыз