Әйгілі суретші Пикассоның туындысы аукционда 139 млн долларға сатылды

Әйгілі суретші Пабло Пикассоның "Сағат таққан әйел" суреті Sotheby's аукционында 139 миллион долларға сатылды. Бұл аукционда сатылған испандық суретшінің екінші ең қымбат туындысы болып саналады.

BBC орыс басылымының хабарлауынша, Femme a la Montre ("Сағат таққан әйел") картинасы биыл аукционда сатылған ең қымбат жұмыс болған.

"Сағат таққан әйел" туындысынан құны жағынан тек 2015 жылы Christie's аукцион үйінде сатылған "Алжир әйелдері" сериясындағы картиналардың бірі асып түскен. Оның бағасы 179,3 миллион долларды құрады.

Аукцион басталғанға дейін "Сағат таққан әйел" туындысының бастапқы құны 120 миллион долларға бағаланған еді. Сатып алушының аты-жөні жарияланған жоқ.

Аталған сурет АҚШ-та атақты америкалық өнерсүйгіш Эмили Фишер Ландаудың коллекциясында 50 жылдан астам сақталған.

Ландау биыл наурыз айында 103 жасында қайтыс болды. Оның барлық өнер жинағы бірнеше жүздеген миллион долларға бағаланады.

Мәтіннен қате тапсаңыз, бізге жазыңыз