Финляндия 30 қарашадан бастап Ресеймен шекараны толығымен жабу туралы шешім қабылдады

Финляндия премьер-министрі Петтери Орпо бүгін Ресеймен шекара екі аптаға - 30 қарашадан 13 желтоқсанға дейін толық жабылатыны туралы хабарлады.

Yle хабарлауынша, Финляндия премьер-министрі қауіпсіздік жағдайына байланысты шекараның уақытша жабылатынын айтқан.

"Финляндияның премьер-министрі Петтери Орпо шығыс шекараның толық жабылғанын мәлімдеді. Финляндия мен Ресей арасындағы шекара 30 қараша мен 13 желтоқсан аралығында толығымен жабылады", - деп хабарлайды басылым.

Ішкі істер министрі Мари Рантанен Мемлекеттік кеңес шығыс шекарадағы барлық бақылау-өткізу пунктін уақытша жабуға шешім қабылдағанын және пана сұраушылардың өтініштері әуежайлар мен су арқылы шекаралық өткізу пункттерінде қабылданатынын айтты.

Сондай-ақ Финляндия Ішкі істер министрлігінің ресми сайтында Ресеймен құрлықтағы шекарадағы барлық өткізу бекеті 13 желтоқсанға дейін жабылатыны айтылған.

"Үкімет сәрсенбіден бейсенбіге қараған түні, яғни 2023 жылдың 30 қарашасынан бастап Райа-Йоосеппи шекаралық өткелін жабу туралы шешім қабылдады", - делінген жазбада.

Басылым тамыз айының басынан бері шығыс шекарадағы өткізу пункттері арқылы Финляндияға 1000-ға жуық адам визасыз келгенін хабарлады. Олардың көпшілігі баспана сұраған.