Израиль Газа секторының солтүстігінде ХАМАС қолбасшылығы толық жойылғанын мәлімдеді

Израиль армиясы Газа секторының солтүстігіндегі ХАМАС командалық құрылымының "демонтажын аяқтағанын" мәлімдеді.

Цахал өкілі Даниэль Хагари журналистерге палестиналық содырлар қазір бұл аймақта тек үзік-үзік және "командирлерсіз" жұмыс істейтінін айтты. Оның айтуынша, Израиль Газаның солтүстігінде 8 мыңға жуық содырды жойған. Би-Би-си бұл ақпаратты дербес растай алмайды.

Оның айтуынша, Израиль қорғаныс Армиясы (Цахал) қазір ХАМАС-ты Газа секторының орталығы мен оңтүстігінде жоюға бағытталған.

Газа Денсаулық сақтау министрлігінің мәліметі бойынша, ХАМАС-пен соғыс басталғалы Израиль күштері 22 мыңнан астам адамды өлтірген. Сенбіде министрлік кейінгі 24 сағат ішінде 120-дан астам өлімі тіркелгенін хабарлады.

Сектордың бұл аумағы қирап, 2,3 миллион тұрғынның көбі үйін тастап кетуге мәжбүр болған.

Израильдің шабуылы 7 қазанда ХАМАС содырлары Израильдің оңтүстігіне тосын шабуыл жасағаннан кейін басталды, нәтижесінде 1200 адам қаза тапты, олардың көпшілігі бейбіт тұрғындар еді, 240-қа жуық адам кепілге алынды. Тұтқында болған кейбірі босатылғаннан кейін ХАМАС пен басқа топтарда 120-дан астам адам қалып отыр.

Премьер-министр Беньямин Нетаньяху сенбіде Израиль ХАМАС-ты жою, кепілге алынған адамдарды қайтару және Газаның Израильге қауіп төндірмеуін қамтамасыз ету операциясын жалғастыратынын растады.

"Біз толық жеңіске жеткенше қалған істің бәрін ысырып қоя тұруымыз керек", - деді Нетаньяху.

Сонымен қатар "Хезболла" содырлары сенбіде Солтүстік Израильге ондаған зымыранын ұшырған. Бұл, олардың айтуынша, осы аптада Бейрутта ХАМАС-тың жоғары лауазымды шенеунігін өлтіруге алдын ала жауап болған. Салех әл-Арури Ливан астанасындағы ғимаратқа Израильдің соққысынан қаза тапты делінді.

Иран қолдаған ливандық қозғалысының мәлімдемесінде ол Мерондағы әуе қозғалысын басқару базасына 62 зымыранмен соққы жасағаны айтылды.

Израиль әскерилері Ливаннан 40-қа жуық зымыран ұшырылғанын анықтап, қарсы әрекет еткенін мәлімдеді.

Мәтіннен қате тапсаңыз, бізге жазыңыз