АҚШ Йемендегі хуситтерге тағы да шабуыл жасады

АҚШ Иранның Йемендегі қарулы және одақтас хуситтер қозғалысының нысандарына төртінші соққылар легін жасады, бұл мәліметті бейсенбіге қараған түні Пентагон шенеуніктері растады.

Centcom - аймақтағы америкалық күштер қолбасшылығы хабарына қарағанда, соққылар америкалық әскери кемелерден ұшырылған Tomahawk зымырандарымен жасалған.

Ұлыбританияның Қорғаныс министрлігі ВВС-ге Йеменге қарсы соққылардың бұл сериясына қатыспағанын айтты.

Орталық қолбасшылықтың мәліметінше, Қызыл теңіздегі кемелерге шабуыл жасауға дайындалған 14 хуситтік зымыран нысанаға алынған. Олар ұшыру қондырғыларына орнатылған, сондықтан "АҚШ Әскери-теңіз күштерінің сауда кемелеріне тікелей қауіп төндірді және кез келген уақытта ұшырылуы мүмкін, бұл америкалық қарулы күштерді өзінің ажырамас құқықтары мен өзін қорғау міндеттерін пайдалануға мәжбүр етті" делінген хабарламада.

Осыдан біраз уақыт бұрын Байден әкімшілігі хуситтерді халықаралық террористік ұйым деп жариялап, өзінің бұрын қабылданған шешімінің күшін жойды. Президенттің ұлттық қауіпсіздік жөніндегі кеңесшісі Джейк Салливан бұл қадам хуситтердің сауда кемелеріне жасаған шабуылдарына жауап ретінде жасалғанын айтты.

Жаңа соққылардан бірнеше сағат бұрын хуситтер 11 қаңтардан бергі екінші шабуылын жүргізген. Бұл иесі америкалық Genco Picardy кемесі еді.

Centcom хабарына қарағанда, көтерілісшілер Аден шығанағындағы Genco Picardy кемесіне соққы жасаған. Кеме зақымданған, бірақ шабуылдан экипаж мүшелерінің ешқайсы зардап шеккен жоқ.

Дүйсенбіде хуситтер басқа америкалық кемеге баллистикалық зымыранмен соққы жасаған, бұл олардың шабуылдары басталғалы америкалық кемеге зақым келтірген алғашқы шабуылы болды.

Вашингтон сәрсенбіде болған соққылар алдын алу болғанын және содырлар жақын арада ұшырылуға тиіс болған қаруды жойдық деп мәлімдеді.

"Бұл соққылар біз қабылдаған басқа әрекеттермен бірге хуситтердің Қызыл теңізде, Баб-әл-Мандеб бұғазында және Аден шығанағындағы халықаралық сауда кемелеріне ақылға қонымсыз шабуылдарын жалғастыру мүмкіндігіне кедергі жасайды", - делінген Centcom мәлімдемесінде.

Centcom командирі генерал Майкл Курилла АҚШ хуситтерге қарсы "шетелдік теңізшілерге қауіп төндіруін тоқтатпайынша және Қызыл теңіздің оңтүстігінде және оған жақын орналасқан су жолдарында сауда тасымалдау жолдарына қауіп төндіруін тоқтатпайынша" әрекет ететінін мәлімдеді.

11 қаңтарда АҚШ пен Ұлыбритания Канада, Аустралия, Нидерланды және Бахрейн сияқты бірнеше елдің қолдауымен Хуситтер Қызыл теңіз бен Баб-әл-Мандеб бұғазындағы кемелерге шабуыл жасауды доғару туралы талабы орындалмағандықтан алғашқы соққылар легін жасаған еді.

Иран қолдап отырған және оның мүддесін қолдайтын хуситтер Газадағы ХАМАС-пен ынтымақтасып, Израильмен байланысы бар деген кемелерге шабуыл жасайтынын мәлімдеген. Алайда Израиль мен оның азаматтарына ешқандай қатысы жоқ кемелер де шабуылға ұшыраған.