SpaceX компаниясы ғарышқа төрт туристі ұшырды

Axiom Mission 3 (Ax-3) миссиясы аясында Crew Dragon кемесімен Халықаралық ғарыш станциясына (ХҒС) ғарыш туристері ұшырылды, деп хабарлайды SpaceX сайтына сілтеме жасаған KAZ.NUR.KZ.

Компания сайтында жарияланған хабарға сәйкес, кеше, 18 қаңтарда шығыс уақытымен 16:49-да (19 қаңтарда, жұмада, Астана уақытымен 03:49-да) NASA-ның Кеннеди атындағы ғарыш орталығындағы ұшыру кешенінен Falcon 9 зымыран тасығышы арқылы Crew Dragon ұшырылған.

"Орбита зертханасында экипаж адам физиологиясы мен өнеркәсіптегі технологиялық жетістіктерге арналған 30-дан астам ғылыми эксперименттер жүргізеді", - делінген SpaceX сайтында.

Ax-3 экипажының құрамында төрт адам бар: NASA-ның бұрынғы ғарышкері Майкл Лопес-Алегрия (кеме командирі), Италия әскери әуе күштерінің полковнигі Вальтер Вилладей, Швеция азаматы Маркус Вандт және Түркия әскери әуе күштерінің ұшқышы Альпер Гезеравджы.

Мәтіннен қате тапсаңыз, бізге жазыңыз