Украина билігі Зеленскийге қастандық жасау әрекетінің алдын алғанын мәлімдеді: екі полковник ұсталды

Украинаның қауіпсіздік қызметі президент Владимир Зеленскийді және елдің басқа да жоғары басшыларын өлтіру жоспарын әшкерелегенін айтты. Украинаның арнайы қызметі Ресей билігін қастандық дайындады деп айыптады.

Украина қауіпсіздік қызметінің (УҚҚ) хабарлауынша, Зеленскийді, сондай-ақ Украина Қорғаныс министрлігінің барлау бас басқармасының басшысы Кирилл Буданов пен УҚҚ басшысы Иван Малюкті өлтіру жоспарланған.

Операция аясында президенттің қауіпсіздігіне жауап беретін Украинаның мемлекеттік күзет басқармасының екі полковнигі ұсталды.

"ФҚҚ агенттік желісінің міндеттерінің бірі – мемлекет басшысын кепілге алып, кейін оны өлтіре алатын президенттің күзетіне жақын әскери қызметшілер арасында орындаушыларды іздеу болған", - делінген УҚҚ хабарында.

УҚҚ-ның Telegram-дағы арнасында жарияланған ақпарат бойынша, Мемлекеттік күзет басқармасының күдікті қызметкерінің айғақтарының жазбасына сүйене отырып, оған мұндай адамдарды іздеу міндеті 2022 жылдың ақпан-наурыз айларында қойылған. Жазбада бұл адам Ресейдің барлау агенттіктері бірнеше жыл бұрын, 2014 жылдан кейін жұмысқа қабылдағанын айтады.

Украинаның Бас прокурорының кеңсесі өзінің Telegram-дағы арнасында күдіктілер Мемлекеттік күзет қызметінде қызмет етіп жүргенде "Ресей Федерациясының ФҚҚ өкілдеріне Украинаға қарсы диверсиялық іс-шаралар жүргізуге ақшалай сыйақы үшін ерікті түрде көмек көрсетті" деп жазды.

УҚҚ мәліметінше, Будановты Пасхаға дейін өлтіру жоспарлаған және қастандық жоспары: "алдымен жалданған агент адамның күзетпен қозғалуын бақылап, жауға ақпарат беруі керек болған", содан кейін "шенеунік баратын үйдің координаттары бойынша зымыран соққысы жоспарланған".

Одан кейін шабуыл орнында қалған адамдарға дрон соққысы, сондай-ақ тағы бір зымыран соққысы жасалуы керек болған.

УҚҚ хабарламасында белгілі бір ресейлік агент үшін қару-жарақты "МКҚ полковникі (Мемлекеттік күзет басқармасы - ред. ескертпесі) қамтамасыз еткен, ол Киевке FPV-дрондарын, РПГ-7-ге зарядтарын, сондай-ақ МОН-90 миналарын жеке өзі әкелген" делінген.

Сондай-ақ барлау қызметі ресейлік агенттің хат-хабарлары мен тәркіленген қару-жарақ пен оқ-дәрілердің суреттерін жариялады.

Әзірше Ресей билігі УҚҚ мәлімдемелеріне әлі түсініктеме берген жоқ, соғыс жағдайында Би-би-си соғысушы тараптардың ресми органдарының мәлімдемелерінің дұрыстығын растай алмайды.