Алтындай және ақшалай 500 млн доллар: Израиль Бейрутте аурухана астында "Хезболланың" бункері бар екенін хабарлады

ЦАХАЛ баспасөз хатшысы Даниэль Хагари "Хезболланың" бункері анықталғанын, Бейруттегі ауруханалардың бірінің астында орналасқан бункерде алтындай және ақшалай 500 миллион доллар сақталғанын мәлімдеді. Бұл туралы The Times of Israel басылымына сілтеме жасаған KAZ.NUR.KZ хабарлайды.

Оның айтуынша, Израиль ұйымның қаржы институттарына шабуыл жасаған. ЦАХАЛ өкілі олардың бірі жақында өлтірілген Хасан Насралланың бункері екенін айтты.

"Бункер әдейі аурухананың астына орналастырылған және онда жарты миллиард доллар ақшалай және алтындай сақтаулы", - деп келтіреді Хагаридің сөзін басылым.

Ол Израиль әуе күштері осы орынды бақылап отырғанын айтты.

Сондай-ақ баспасөз хатшысы Иран "Хезболлаға" демеушілік жасайтынын атап өтті. Хагари сонымен қатар топтың әскери операцияларды қаржыландыру әдістерін айтып берді.

Ол сондай-ақ Израиль ұйымның қаржы операцияларына соққы беруді жалғастыратынын мәлімдеді.

Еске салсақ, 28 қыркүйекте Израиль армиясы "Хезболла" жетекшісі Хасан Насралланың көзі жойылғанын хабарлаған болатын. Израиль армиясының мәліметінше, Насралла Бейрутке шабуыл кезінде қаза тапқан. Онымен бірге қозғалыстың басқа жетекшілері де қайтыс болды.

Мәтіннен қате тапсаңыз, бізге жазыңыз