Анкарадағы Turkish Aerospace штаб-пәтеріне шабуыл: билік күрд сепаратистерінен күдіктеніп отыр

Билік өкілдері Анкара маңындағы Turkish Aerospace (TUSAŞ) түрік аэроғарыштық компаниясының штаб-пәтеріне жасалған шабуылда кем дегенде бес адам қаза тауып, 22 адам жараланғанын мәлімдеді.

"Террорлық акт салдарынан қаза тапқандар саны беске жетті, жараланғандардың жалпы саны 22 адам, оның үшеуі ауруханадан шығарылды", - деді Түркияның ішкі істер министрі Әли Ерликая.

Оның айтуынша, шабуыл елде тыйым салынған "Күрдістан жұмысшы партиясының" қызметіне қатысты болуы әбден мүмкін.

Ерликая бұған дейін екі шабуылшының – ер адам мен әйелдің өлтірілгенін айтқан.

Сәрсенбі күні кешке ол билік шабуылдаушыларды анықтағаннан кейін толық ақпарат пен дәлелдерді бөлісуге уәде берді.

Шабуыл кезінде Қазанда БРИКС саммитінде болып, Ресей президенті Владимир Путинмен келіссөздер жүргізген Түркия президенті Режеп Тайип Ердоған бұл оқиғаны "құйтырқы шабуыл" деп атады.

"Террорлық шабуылдың алғашқы сәтінен-ақ біздің қауіпсіздік күштері тез арада араласып, лаңкестерді залалсыздандырды. Түркияға созылған лас қолдың міндетті түрде үзілетінін халқымыз білуі керек. [...] Террористік қауіптердің барлық түрлерімен және терроризмді қолдаушылармен күресіміз жалғасады", - деп жазды ол X әлеуметтік желісінде.

Түрік ақпарат құралдарының хабарлауынша, шабуылдаушылар кәсіпорынға күзет ауысымы кезінде келген. Олар жарылғыш затты іске қосып, содан кейін атыс басталды.

Жергілікті бұқаралық ақпарат құралдары табылған қарулардың: автоматтар, тапаншалар, оларға оқ-дәрілер және жарылғыш заттардың суреттерін жариялады.

Ішкі істер министрі Әли Ерликая әлеуметтік желіде "Түрік аэроғарыш өнеркәсібіне қарсы лаңкестік әрекет жасалды" деп жазды. Анкара мэрі Мансур Явас шабуылға қатты қайғырғанын айтты.

НАТО Бас хатшысы Марк Рютте Ердоғанмен әңгіме жүргізгенін және Анкараның Альянсты қолдайтынын мәлімдеді.

"Мен жаңа ғана президент Ердоғанмен Анкарадағы теракт туралы сөйлестім. Менің ұстанымым анық: НАТО Түркияны қолдайды", - деп жазды Рютте X әлеуметтік желісінде.

Мәтіннен қате тапсаңыз, бізге жазыңыз