Трамп Байденнің "қоқыс" туралы сөзінен кейін қоқыс таситын көлікке мінді (видео)

АҚШ президенттігіне үміткер Дональд Трамп Байденнің "қоқыс" туралы сөзінен кейін қоқыс таситын көлікке мінген. Америкалық телеарналар арнайы жилет киген саясаткерді видеоға түсіріп алған.

Саясаткер Висконсиндегі Грин-Бэй халықаралық әуежайында артында "Трамп" деген жазуы бар қоқыс таситын көлікке мінген.

"250 миллион адам қоқыс емес", - деді Трамп жүк көлігіне отырар алдында.

Daily Mail газетінің жазуынша, саясаткер қоқыс таситын көліктің терезесінен еңкейіп отырып журналистермен сөйлескен.

"Менің қоқыс таситын көлігім туралы не айтасыз? Бұл көлік Камала мен Джоның құрметіне арналған", - деді ол.

Трамптың айтуынша, Джо Байденнің мұндай мәлімдеме жасауы нағыз сұмдық.

АҚШ президенті Джо Байден Zoom желісіндегі бейнеконференция барысында Дональд Трамптың сөзіне түсінік бере отырып, республикашылдың жақтастарын "қоқыс" деп атады.

Трамптың өзі де Пенсильвания штатының Аллентаун қаласында өткен митингте сөйлеген сөзінде бұл мәлімдемеге жауап қатты.

"Оны (Байденді – ред. ескертпесі), өтініш, кешірулеріңіз керек. Өтінемін, оны кешіріңіздер. Өйткені ол не айтып, не қойғаны білмейді", - деді Дональд Трамп.

"Ол Камаладан гөрі мені ұнататынына сенімдімін", - деп әзілдеді Трамп.