Испанияда қарттар үйі өртеніп, 10 адам қаза тапты

Испаниядағы Сарагоса қаласына жақын маңда орналасқан қарттар үйі өртеніп, кем дегенде 10 адам қаза тапты, тағы бірнеше адам жараланды. Бұл туралы KAZ.NUR.KZ CNN телеарнасына сілтеме жасай отырып хабарлады.

Телеарна ақпаратынша, Сарагосадан 28 шақырым жердегі Вильяфранка де Эбро елді мекенінде орналасқан қарттар үйі жұма күні таңертең өртенген.

Жергілікті билік кем дегенде 10 адамның қаза тапқанын, екі адамның жағдайы ауыр екенін хабарлады. Әзірге өрттің неден шыққаны белгісіз.

Қарттар үйінде 82 адам тұрады. Мұнда деменцияға ұшырағандар, психикалық ауытқуы барлар емделеді.

Вильяфранка де Эбро мэрі Волга Рамирес он адамның неден қайтыс болғанын журналистерге түсіндірді.

"Олар өрттен емес, ыстан уланып қаза тапқан", - дейді Рамирес.

Аймақта жұмаға белгіленген үкіметтік шаралардың бәрі кейінге шегерілді. Испания премьер-министрі Петро Санчес қаза болғандардың туыстарына көңіл айтты.

Автор: Талғат Дүйсенбек

Мәтіннен қате тапсаңыз, бізге жазыңыз